سینئر اداکارہ غزالہ جاوید نے کہا ہے کہ بیوی کی جانب سے شوہر سے جھگڑے کی بات اپنے والدین، بہن، بھائیوں یا میکے میں کسی کو بھی بتانے سے مسائل بڑھتے ہیں، انہیں ایسا نہیں کرنا چاہیے۔ ایک انٹرویو کے دوران اداکارہ کا کہنا تھا کہ اسی طرح شوہر کو بھی بیوی سے جھگڑے کی بات اپنے والدین یا بہنوں سے نہیں کرنی چاہیے، کمرے کی بات کمرے تک محدود رہے تو معاملات بہتر رہتے ہیں۔انہوں نے انکشاف کیا کہ ان کے پاس ہر روز 15 سے 20 لڑکیوں اور لڑکوں کے فون آتے ہیں، جن کے آپس میں جھگڑے رہتے ہیں۔ان کے مطابق انہیں زیادہ تر شوبز میں نئی شادیاں کرنے والے جوڑے فون کرکے مسائل کا حل پوچھتے ہیں۔ان کا کہنا تھا کہ وہ لڑکیوں کو یہی مشورہ دیتی ہیں کہ وہ شوہر سے جھگڑے کی بات اپنی والدہ تک کو نہ بتائیں اس سے مسائل بڑھتے ہیں۔ان کا کہنا تھا کہ جس گھر میں مرد مضبوط ہوتا ہے، وہاں جھگڑے کم ہوتے ہیں، جو مرد اپنی والدہ اور بیوی کو یکساں عزت دیتا ہے، وہاں مسائل نہیں ہوتے۔

کریڈٹ: انڈیپنڈنٹ نیوز پاکستان-آئی این پی