ٹی وی و فلم کے سینئر اداکار فیصل رحمن نے سوشل میڈیا پر نئی دلچسپ ویڈیو شیئر کردی۔انسٹاگرام پر اپلوڈ کیے گئے اپنے ویڈیو پیغام میں اداکار نے بتایا کہ میں خود اس وقت پاک بھارت سرحد کے درمیان کھڑا ہوں، میں یہاں جنگ کا ماحول دیکھنے آیا تھا مگر یہاں تو ہو کا عالم ہے، دور دور تک جنگ کی کوئی خبر نہیں ہے۔ان کا کہنا ہے کہ یہاں کوئی آواز کوئی مہم جوئی کے آثار نظر نہیں آ رہے ہیں بس ٹیوب ویل کی آواز ہے۔ فیصل رحمن نے اپنے ویڈیو پیغام میں کہا کہ میں اس وقت صرف دو ڈھائی کلو میڑ دور بیٹھا ہوں، یہاں سے بھارتیوں کی سرحدی رکاوٹیں بھی نظر آرہی ہیں، ایک طرف بھارتی گائوں جامن ہے اور دوسری جانب پاکستانی گائوں بیدیاں ہے۔فیصل رحمن نے اپنی ویڈیو کے اختتام میں کہا ہے کہ میں بھارتیوں سے کہنا چاہتا ہوں چھوڑو جنگ، جنگ میں کیا رکھا ہے اور اگر جنگ ہو بھی گئی تو میں نے چائے تیار کر کے رکھی ہوئی ہے، سنا ہے بھارتیوں کو چائے بہت پسند ہے۔

کریڈٹ: انڈیپنڈنٹ نیوز پاکستان-آئی این پی